දිනක පෙර ඕවිටේ බෝවිටිය දං කහට
මතක ඇත අද වගේ සුවඳ දුන් ඉල් මහට
බැතක වරුණා අරං වී කරල් නැමෙන විට
සිතක ඉපදුන සිතුම් තාම එළියයි ඇහැට
වී කවුඩු ගේ කුරුළු ගිරා හඬ පිස හමන
ඈත දුර ඉසව් වල සුවඳ රැඳි ඇල් පවන
කීන දං සඟෝගත් නිසොල්මන් නුග සෙවණ
දෑ සවන් පුරෝගෙන හඬනයුරු අද ඇසෙන
නිල් ගුවන සිප ඇදෙන විටදි මහ කළු වළා
වැව් දියේ නිළුපුලන් මද නලට පෙම් කළා
දිය සෙවල බැඳි බැඳී පරණ වුණ ගල් තලා
සිහිනයෙන් පෙර සේම "ගමට එනු" ඉඟි කළා
බැද්දෙ හේනෙන් ඇසෙන සිව් පදක රස තියා
පැළේ කොනකට වෙලා වස් දඬුව පිඹි නියා
පුන් සඳත් නැති රැයේ තරු කැළුම් සොය සොයා
නොදැනීම අද රෑත් හොරෙන් හේනට ගියා
පන්සලේ පාමුළට වී පිපුණ අරලියා
වැට දිගට මායිමේ පිරුණ ගස් හෙරලියා
ඇල අයිනෙ පිරුවටය සඳ සිඹින කෙකටියා
තවත් එක් සිහිනයකි පැමිණි ගම හැරපියා
No comments:
Post a Comment